Gwárch, Balóchi Goshten o Bataláni Gechéné

 

Gwárch, Balóchi Goshten o Bataláni Gechéné

 

A Collection of Baluchi Sayings & Proverbs

 

Sardánk

 Gehén wánók bendátá jahlay sayén Balóchi batalán delgósh bekan! 

1► Begosh darwázagá, diwál beshkont.

2► Gwashton janekká, gósh gept neshárá.

3► Tirán kashókái janay, námahá Kasarkanday kanay.

 

Ji, Géshterén bataláni kár hamesh ent ke edá tir kashókái janag bant. Bezán hamáiá goshagi ent áiay námá mager o bogoshy. Cha é kárá chosh bit ke már ham merit o latth ham naproshit. 

 Batal eshárahi zobáná yá gón shobén o chahrán mánádár o porpegrén gapp janagay honar ent. Batal o goshten chónáén zobánéay bendáti sabakk ant zobánay hamá hélger o darbarókáni háterá ke á gáláni shobén o chahri kármarzá zánag lóthant. Batal wati eshkonók yá wánóká sekén dayant ke á pa gáláni andari máná o bezántáni dar géjag o zánagá bejédhit. Eshkonók yá wánóké ke gáláni chérén yá chahr o shobéni mánáyáni dar géjag o pahmagay honará hél kant godhá démterá pa áiá labzánki zobán o shayráni sarpad bayag ásánter bit.

 

Mán Balóchi goshten o batalán oshter bebit yá aps, har, kochekk yá gók géshter chó gwárchá ant ke goptáray shekárián pa báz máná o bezántán kármarz kotagant.

Balóchi batal o goshten sakk báz ant. Anchosh ke yakkén bongapp, jédhah, didánk, hayál o rabédagi kadréay bábatá cha yakkéá géshter batal dast kapit hamé paymá yakkén batalay do o chár namunag o warzhan ham hast. Man edá alkápterén namunag gechén kotag o hawár gétkagant. É gechénay tahá sajjahén batal o goshtenáni namunag hawár naant. 
 Balóchiay é batal o goshten ke gédi ant o cha dur káyant, esháni tahá márá géshter Balóchay hawárén rabédagi dánái, gwastánki sarkapt o wákeyátáni gwácheni rang o dróshom gendagá káyant. Lahtéay sar pa dar ke á jaháni ensáni didánk, máresht, jédhah, kadr o hayáláni neshóndár ant.   

 Mán Látini Balóchi syáhagá é bataláni awali gechén ent ke gestáén tarzéá redoband dayag butag, ábáni redá ennán balkén lahté gechéni gáláni redá. É gál abrami paddaráhesht o albárén ensán o Balóchay zendmán, rájmán o rabédagá jwán syádi dárókén mazan bestárén azbábáni nám ant. Chó ke hawr, róch, shap, marg, zamin, kár, bér, baht, oshter, gók, zobán, gapp o habar o dege. Anchó ke borzá goshag butag é gál yá azbáb tahná wati jenday máná o bezántán kármarzag nabutagant balkén pa mardomay pant o sójá é pa wadh wadhén bezántán kár gerag butagant.

Omét ent cha eshán chandé kárámadén pant o sój tai wandhá ham kapit.

 

Bahtán Balóch

 

 

Aps / Bór

 

1► Apsá haray banjáhá maband.

2► Aps o aps medhant, lagattá har wárt.

3► Apsá watá nál kot, kadhokká watá golméhé jat.

4► Aps zánt ke mani wájah jóláhegé.

5► Aps tachit pa maydán, mál mánit pa kahdán.

6► Ráh pa pád o gám, aps pa zén o lagám.

7► Aps agán wár o azáb ent nály dará bant gawhari, har agán borz o boland ent ákelán setk nabit.

8► Dáná wati apsá galáit, nádán wati janá.

9► Mardomá nasl dárit, aps o táziá lagám.

10► Apsá kass kattar nakant.

11► Apsay lagattá aps saggit.

12► Aps agán pir ent, ezzaty gésh ent cha hará.

13► Bór pa wájah, boz pa bibi.

14► Bóráni jang nabit bale rombénagesh hakk ent.

15► Bór wati wájahá zánt.

16► Bór gón wájahán rádénán, ráj gón mehterán hánénán.

17► Bór cha wájahá gostáh ent ke lengá chappoká tarrénit.

18► Bór cha gwazá, chábok cha ladá, parchá natáchay oo gázi.

19► Págá pa kehébé band o bórá bélagámá tách.

 

Áp

 

1► Áp jáná pák kant o rásti delá.

2► Ápá band dárit o kárchá haddh.

3► Ápá begend shalwárá belánch.

4► Áp mán dapá kódek zére pá.

5► Áp pa áprandá rawt o boz pa bánok.

6► Áp pa géchen barag nabit.

7► Ápá chér dayay, nambagá chón kanay.

8► Áp pa chammag sabzag pa nambag.

9► Ápay mantagá rógen dar nayt.

10► Áp pa áp rawt o golám pa móled.

11► Tásé áp bwar sad sálay wapá bekan.

12► Áp o ásay sangati nabit

13► Áp cha talápá, nán cha kalátá.

14► Ápay thapp hoshk bit, bénagay thapp práh rawt.

15► Áp cha boná lord ent.

16► Óshtátagén áp naóshtit.

17► Ápá hár gón ent.

18► Áp gwálagá kár nakant o sój kas o nákasá.

19► Áp johlánká wat dar géjit.

20► Óshtátagén áp hár nakant.

 

Brát

 

1► Bacchay badal bacch ent bale brátay badal gár ent.

2► Brát pa wati brátá zátagén gók ent.
3► Brát ke bédelén Lalláh ent, béráni gerók Alláh ent.
4► Brátá begend o gohárá beger.
5► Brátdári, brahdári.
6► Brátay dast pa gohárá rasit.
7► Brát brát hesáb rást.
8► Brát goháráni áhenén pall ant.
9► Bráté gón brátá nátepák bit, sáhebi akly rawt o gár bit, dozhmenén mardáni shekár bit.
10► Brátáni gohár bátán bale brátáni mohtáj mabátán.
11► Sakkián brát gón markabán óshtant, wasshián hátunén jan nóshant.

12► Hamshám bebátán bale bébrát mabátán.
13► Dán gohárá jód nabit, brátá jan mabát.
14► Háterá brátáni, nawkar án nesháráni.
15► Habará pa Hodá bekan, latthá pa brátá bwar.
16► Hilahán mál o kénagán brát báz nabant.
17► Sar mabát bébrátén goháráni.
18► Shambeh o shánzdah sar mashód brátáni gohár,
Shambeh pa brátá shumm ent o shánzdah pa petá.
19► Mennatán jangdóstén mazári brát nabant.
20► Brát agán kór ent, gohár ométwár ent.
21► Brát agán légár o pechármát ent, mehry cha kollén álamá zyát ent.
22► Hawr pa gwát, mard pa brát.
23► Brátay shodigén láp sér bit bale goháray sotkagén magun dráh nabit.
24► Á ke nabit pa mátá, chón merit pa brátá.
25► Imáné ke brátay kárá nayt godhá che kárá kayt.
26► Cha éwakiay baheshtá brátáni dózeh geh ent.

27► Brát mani atkag o Bárán ent, sar mani dhangar o dárán ent.

28► Brátán jang kot ablahán gal kot.

29► Brátán che Issá che Mussá.

30► Brátá pa brátay lédhawá band kapit, brát mánit o lédhaw mán jókjáhá proshit.

31► Brát ke dir ent cha wati brátáni gwará, anchó ke bójig mán nilbómén zerá. 

32► Brátay badal paysah makan, gón dozhmenán kessah makan.

33► Mard pa brát tarrit o námard pa mál.

34► Brát jánay brág ent.

35► Brátay jáhá brátá nakoshant.

36► Brát nabit Dódái mani brát ent, molk nabit Hendostán peráwán ent.

37► Brát gón bráti kénagá, gazzá narópit bénagá.

38► Hecch brát cha brátá narawt.

 

Gwárch

1► Démay gwárch tori harkas bebit, poshtay shekári hamá ent.
2► É tai wati dém ent yá ratkagén gwárch ent.
3► Gwárchay démá machár, gwárchay poshtá bechár.
4► Betors cha hamiá ke modám gwárchy gón ent.
5► Rad wártagéné án gwárcháni, cha malmalén sharán hazán.
6► Á ke shekáriay gwárch ent bezán shekárá sharidár ent.
7► Degeray gwárch bayagá pésar wati imáná sai bekan. 

Ched o géshén Balóchi goshten o bataláni wánagay háterá ketáb Gwárch jahlá Pi Dhi Epay sheglá dayag bitag, eshiá shomá hamedá want o ér gétkg (Download) ham kanet.